Ang Paborito kong Kulay

Simula noong ako’y bata pa,

Hinubog ako sa pangaral nila

Isa na riyan ang mga lilim ng kulay,

Dapat daw angkop sa aking tinataglay

Asul ang paborito kong kulay,

Tila niyayakap ako nito at pinapahuway

Magaan ito sa lente ng aking mga mata,

Na animo’y kapayapaan ang dala.

Minsan, paborito ko rin ang dilaw,

Lalo na sa tingkad nito kapag natanaw

Sinasalamin nito ang sikat ng araw,

At ang pag-asang nakapupukaw

Madalas, paborito ko naman ang pula,

Kakulay kasi nito ang labi niya

Hindi rin kasi ako takot sa dugo,

O kahit ‘di mapasakin ang kanyang puso.

Malapit din sa aking loob ang berde,

Ang astig kasi at ang lakas maka-lalaki

Ito rin ang kulay ng mga sundalo,

Maging ang masustansyang mga gulay sa bahay kubo

Marami pa akong nais at gusto,

Na hindi angkop sa kasarian ko

Ngunit ang tanging alam ko,

Walang pinipili ang kulay para ito’y maging paborito.

-------------------------------------------------------------------------------------------------------

Written by: Moises Caleon

Layout and Design by: Simon Estanislao